近年經常都聽到不同大大小小的社區計劃，當中有很多都展示着社區人情味美好的一面。今晚係藍屋建築群內，這片新復修完嘅空地上邊，見到社區內另外一種美好。
這片空地，將來將會係一片公共空間，所以今晚就同街坊同埋附近嘅居民做咗一個工作坊。大家討論一下究竟呢個公共空間可以點樣管理呢？又唔想好似一般康文署嘅公園咁樣乜都唔得，但係作為居民日常生活亦都想大家可以尊重返我哋喺度生活嘅感受。究竟點樣先可以喺唔同嘅人士之間搵到平衡呢？
所以今晚我哋就舉行左一個工作坊，首先大家做一啲角色扮演，例如係食煙飲酒、露宿者、嘈吵聲音等等。當有呢啲事情發生嘅時候我哋可以點樣應對呢？
大家見到呢一個空間當然好開心，對於呢度大家都有唔同嘅想像。但係我哋有呢個想像嘅權利嘅同時，公眾同樣有咁樣嘅權利。
當你做得嘅時候其他人係咪同時都可以咁樣做呢？但係又唔想一刀切乜嘢都唔俾，一啲街坊平時去其他公園覺得還蠻無理嘅條例，今次自己用另外一個角度去諗，同埋討論就發現裏便有好多唔同大大細細的矛盾。
社區發展，其中一個重要嘅地方係，希望大家透過日常生活發生嘅事件討論，從而搵到一個更加文明嘅生活方式。今次係一個好好嘅練習俾大家去討論，喺裏面自己嘗試用唔同嘅角色代入，希望透過經驗同埋討論搵到更加文明嘅社區生活。
