好鍾意呢個小朋友街坊，呢一兩年睇住佢長大。佢對於身邊嘅事物佢都好有好奇心，乜嘢都想去試，大大下仲發現佢對社區或者係身邊嘅事物都有一份責任感。音樂會之後會幫手收返好啲櫈、幫媽咪攞餸。日常生活裏邊觀察到佢爸爸媽媽對小朋友好信任，亦都好肯俾佢去嘗試唔同嘅嘢可能有時會失敗但係都無所謂，見到佢有陣時做錯或者係做得唔好，就會鼓勵佢唔緊要嘅再嚟過。睇到呢個家庭同小朋友嘅溝通，更加提醒我哋應該點樣去做社區教育。
——————————————–
我哋區裏邊有好多小朋友，每日都見到佢哋一日一日咁樣長大。係社區裏邊做教育同一般教育好唔同，我哋成日都諗點樣嘅教育先可以令到小朋友健康咁成長。
可能平時好多家長都會好驚佢哋犯錯，所以每樣野都要做得啱，每樣野都要去學都要去重複練習。係開始嘅時候已經對自己嘅小朋友失去信任，咁樣當小朋友長大之後又點會有信心去挑戰一啲自己覺得做唔到嘅嘢呢？
有時覺得反而我哋要係小朋友身上便去學習，減低自己對於一啲自己控制唔到嘅事上邊嘅恐懼，要求每樣嘢都係自己嘅控制範圍底下發生。
小朋友好可能會犯錯，錯左咪再試過囉。有陣時睇住小朋友做一啲以為佢都做唔到嘅事，但係慢慢放手俾佢做，一次唔得做第二次，最後見到佢成功，開心嘅係見到小朋友不斷去嘗試，同樣開心嘅係，自己係每一次呢啲情況底下同時去學習信任，亦都同時學識放手離開自己嘅安全範圍去嘗試。
