七分何文田

好多人有錯覺，覺得何文田係高尚住宅區，但同南區有華貴邨，九龍塘有南山邨一樣，何文田都有愛民邨。

攞起份地圖，會見到何文田中心部分叫十二號山，即係愛民邨同俊民苑。愛民邨喺一九七四年落成，屬於全香港第二大屋邨，號稱「九龍 華富邨」，最為人樂道嘅事迹係英女皇嚟過參觀。而俊民苑係香港第一期居屋，位處半山，環境清幽，揸車三分鐘出到旺角，旺中帶靜，四十年前五百呎單位賣十五萬，而家升到六百五十萬，幾手樓仍然有價有市。

愛民邨以東，係老龍坑山，以前有條山谷道邨，全邨都係廉租屋大廈，單位無獨立廁所，破破爛爛，電梯成日壞，走廊黑鼆鼆。終於到二千年拆卸，話過會起居屋，然後八萬五彈出彈入，搞搞下竟然發展成私人屋苑天鑄，貼心政府擔心居民出入唔方便，仲起埋地鐵站畀佢哋。

愛民邨以北，又叫採石山，從前係何文田邨，今日係「何文田邨+何文田一號+皓畋」。何文田邨同山谷邨一樣，一樣係舊式公屋，居住環境一樣咁惡劣。二千年初拆卸，政府話過全邨會原址重建，到頭來又將一半地皮賣咗畀會德豐——豪宅就這樣成了。而另一半起返做公屋，有趣嘅係新邨同豪宅係一條街嘅兩邊，大家景觀相同，適文樓靜文樓呢兩棟起喺山上面仲高過啲新樓。成日都會諗，啲有錢佬花千幾二千萬買個幾百呎單位，公屋月租二三千蚊，到頭來一齊做鄰居，一齊坐擁維港海景，唔知有咩感覺呢？

至於何文田邨北邊，亞皆路街南邊，係完完全全嘅低密度住宅區，同大型屋邨係兩個世界，無遊樂場無商場，我幾乎未去過。呢區有巴富洋樓、巴富花園、富華閣、翠華大廈、本立臺、衛德臺、敬德臺、怡寧苑、美寧臺、雲華臺、嘉苑，啲名全部都好典雅端莊。呢堆樓喺五、六十年代起成，套用畢明嘅說法，當時大戰過後，香港人期盼安樂平穩，發展商命名就以儒雅秀麗為本，簡簡單單寄寓祝福就好。唔似而家啲樓為求吸引北方土豪，樓盤名要豪華有豪華，要氣派有氣派，愈吹就愈大，愈大就愈空。好似附近嘅半山壹號，所謂「半山」，實際只係紅燈山 山腳，話自己係何文田樓王，原來地處土瓜灣。不過凡事兩面睇，半山壹號對面五棟常康苑、常盛閣、雅緻閣、集德苑同日麗苑，毫無疑問屬於何文田，噉點解隔住一條常盛街，半山壹號就係土瓜灣呢？地名因時而異，何文田呢個名，開頭剩係指而家太平道、勝利道同梭椏道一帶，到後來佢嘅勢力擴展至採石山、老龍坑山、十二號山同京士柏山。反而今時今日，亞皆老街同窩打老道夾住嘅一帶「原何文田」，多數都被認為屬於旺角。所以呢，話唔定終有一日，土瓜灣會變成何文田，而今日嘅何文田，又唔知會去咗邊。而就算將來有日，九龍塘消失，香港仔消失，地圖上每一個名字都消失，大概都唔需要驚訝。

愛民邨西南，公主道對面，由過去到現在都叫京士柏，係一個我唔熟悉嘅世界。京士柏有京士柏山（住宅）、帝庭豪園同衛理苑，近佐敦一帶仲有好多會所，西洋波會、印度會、菲律賓會、三軍會……我都係好大個先知呢喥都叫何文田。京士柏山喺我小學對面 ，細個返學放學會見到好多私家車上山落山，不過到今時今日我都未上過去。細個去伊利沙伯醫院，會經過帝庭豪園，唯一嘅印象都係私家車出出入入。兩三個月前接咗份補習，地址正係衛理苑，活咗三十年，前排先第一次由衛理道轉入衛理徑，由衛理徑行入衛理苑。學生屋企係一間我唔識分幾多呎嘅大屋，大門右邊係大廳，有一部六十吋電視，一張四座位梳化，大廳再出係露台，露台對面就係愛民邨。有次我喺露台望返我長大嘅地方，仿佛望到以前嘅自己。以前我成日喺走廊望過嚟，但嗰時嘅焦點唔係衛理苑，而係公主道嘅車來車往。從來無想像過另一側係咩模樣，無想像過馬路嘅一邊一梯兩伙二千幾呎，另一邊一梯三十四伙三百幾呎。

呢喥除咗望到愛民邨，仲望到世界殯儀館一帶嘅舊樓。朋友以前住嗰邊，同我而家土瓜灣嘅劏房差唔多，七、八層，無𨋢，一個單位二三百呎，有啲仲要劏開幾間，老鼠長駐後樓梯，條街總係咁污糟。一條漆咸道，隔開何文田同紅磡。呢邊無老鼠，反而有好多花花草草——好多我屋企生存唔到嘅花花草草。曾經我為咗夏天唔使被蚊咬，都試過養驅蚊草，無奈屋企窗口正對住另一棟樓，陽光唔充足，只能夠見住棵草由綠變黃再變啡，凋零殆盡。而呢個露台上嘅植物，朝氣勃勃，應綠嘅綠，應紅嘅紅。我仲想望多陣嘅時候，家長反而叫我快啲返入嚟，話呢頭多蚊，唔係咁好住。我問︰「有無試過種驅蚊草？」佢話︰「唔種驅蚊草喇，都唔靚。」原來隔一條公主道，可以揀種乜唔種乜，而我乜都種唔到。佢關心嘅係美學問題，而我只能着眼皮肉之身，無蚊咬經已好滿足。

何文田就係噉，各邨各隅自成一角，你有你忙我有我忙，雖然時移世易，唔會再用同一本黃頁，但慶幸今時今日，大家都仲見到維港。