婚慶的排檔 九記

筆為人知 February 6, 2018 則回應

作者簡介

筆為人知

筆為人知採訪各行各業老舖小店的東主,透過他們的歷程,從而感染年輕新一代,將往昔香港人的人情味以及踏實苦幹的獅子山精神繼續傳承下去。(臉書專:https://www.facebook.com/pg/untold.hk/about/?ref=page_internal )


 

綠色的鐵皮檔,掛著大小不一的金漆椰子和紅當當的婚慶用品,把油麻地新填地街市集的一角點綴得份外喜氣。這間有七、八十年歷史的小店,已陪伴了第二代接班人英姐三十多年。「以前阿爸阿媽喺呢度擺檔到依家,養活咗我哋一家十口⋯⋯」

傳統過大禮

過大禮其實是中式的訂婚儀式,是六禮中納徵的一禮。男方於婚禮前一至兩個月,擇一個良辰吉日把聘禮送到女家。在傳統的過大禮中,準新人均要避席,而聘禮多數由媒人或朋友代勞,男方不得在場。「而家過大禮嘅人其實反而多咗㗎!你諗下其實以前只有大戶人家先會有過大禮嘅,以前嘅香港人多數都移民潮落嚟,個個有咩都慳得就慳,儘量講求簡單。其實而家過大禮相對較為大眾化啲,但後生一代就對呢方面無乜認識。」英姐說。

一切從簡

究竟現在的過大禮跟傳統有何不同呢?「依家豬肉、雞、魚都會用利是取代,因為嘢食唔擺得過夜,其他嘅嘢主要都係攞個意頭,比如椰子咁,因為有『爺』有『子』嘛!」英姐笑說。在過大禮中,女家亦會回禮,現在過程已簡化,只要買一份女家回禮即可。至於較為忌諱的水果,如梨、橙和芒果一類,就會可免則免。東西多以雙數為單位,象徵「成雙成對」。

季節性的業務

英姐說,婚慶用品的業務周期性比較明顯,主要因為婚慶的季節多為後半年。較傳統的新人亦會選擇避開農歷七月,所以收到紅色炸彈的時候多數在九月至十二月。筆者訪問英姐的時候正值淡季,而九記亦會擺賣一些蔬菜。「淡季嘅話一日可能得一、兩單生意,所以賣下呢啲唔使白坐一日。」然而,一到了九月,小店便會花枝招展,一堆堆已落訂的囍籃,正等著為準新人獻上祝福。

開業歷史 1940年代
業務 婚嫁用品
地址 油麻地新填地街100號內排檔
電話   96851581

 

(原文刊於作者網頁: https://untoldhk.blogspot.hk/2018/02/blog-post.html?spref=fb

作者Facebook專頁:https://www.facebook.com/untold.hk/?ref=br_rs )